Plantun de Prouvènço

Pèr coumpara dos planto d'encò nostre

Viola riviniana & Scleranthus annuus

Viola riviniana

Violaceae

Nom en français : Violette de Rivinius.

Descripcioun :
La vióuleto-de-Rivinius fai partido dóu group de vióuleto que fai d'entre-nous. Se recounèis à si fueio en rouseto à la flourido, à sis estipulo primo e franjado en triangle (e pas en lanço) e soun esperoun pulèu clar. Trachis dins li bos coume li blachiero sus sòu séusous. Coumpara emé la vióuleto-de-Reichenbach que ié sèmblo proun, mai que trachis pulèu sus cauquié.

Usanço :
Li flour de vióuleto soun manjadisso, li meiouro soun li mai perfumado, coume Viola odora o Viola suavis. Soun richo en vitamino C e A.

Port : Erbo
Taio : 10 à 25 cm
Fueio : Basalo
Tipe bioulougico : Emicriptoufite
Cicle bioulougico : Planto renadivo

Gènre : Viola
Famiho : Violaceae

Ordre : Malpighiales

Coulour de la flour : Vióuleto
Petalo : irreguliero
Ø (o loungour) flour : 2 à 2.5 cm
Flourido : Printèms - Estiéu

Sòu : Si (Ca)
Autour basso e auto : 0 à 2300 m
Aparado : Noun
Mars à juliet

Liò : Blachiero - Champino - Orle de bos - Castagnaredo
Estànci : Mesoumediterran à Subaupen
Couroulougi : Éuropenco
Ref. sc. : Viola riviniana Rchb., 1823 (= Viola canina L. )

Gnavello(-de-l'an)

Scleranthus annuus

Caryophyllaceae

Nom en français : Gnavelle annuelle.

Descripcioun :
Aquelo planto, proun ramificado, se tirasso sus la sablo e lis endré trepeja. Sus si tijo se podon vèire uno à dos bando de péu crespu. Li fueio soun redo e en long. Li flour, verdo, soun pas bèn grosso e fan d'enflourejado agroumelado. La subsp. presentado eici, emé de flour gaire duberto e que trachis dins li mitan primàri, ié dison polycarpos. Coumpara emé la gnavello-renadivo.

Usanço :
Fai partido dóu group (38 meno) de flour dicho "de Bach". Ramenten que lou mege, Dr Edward Bach (1886-1936), adoubè de poutingo de flour que dèvon "armounisa l'equilibre epsichique de la persouno". La gnavello permetrié de prendre de decisioun. En Poulougno, au siècle passa s'acampavo li babo de vermèu (Coccus Polonicus) que reston sus li racino pèr n'en faire un coulourant rouge.